عرش اعلاده علینین آدی اعلا یازیلیب
گوی تاپیب رتبه اودور عرش معلا یازیلیب
یازمارام صورتینی بنذوری شمس و قمره
رشک ائدن صورت مولایه ثریا یازیلیب
دفتر عشقیده باخسان چوخونون آدلاری وار
نام زیبای علی باشدا مطلا یازیلیب
یوخ تعجب یئری گر قوزادی خیبر قاپوسین
قدرت اللهیدی بازوسی توانا یازیلیب
هرکس و ناکسه آقا دئمرم حیدریم
شیعیه تکجه علی سرور و آقا یازیلیب
انبیادن صورا مخلوق جهان قطره دیلر
آقاما قربان اولوم شانینه دریا یازیلیب
هرکسین دردی اولا دردینه درماندی علی
یاعلی سسلینین دردی مداوا یازیلیب
تاپمادیم بیر نفری شانینه مقیاس ایلیم
یاراشان قامتینه قامت زهرا یازیلیب
باخمادی عمر شریفینده زر و سیمه علی
بو سبب دور که علی معدن تقوا یازیلیب
تا سوال ائتدی ملک کیمدی ییر اوستونده ولی
گوردولر ختم نبی سسلدی "هذا " یازیلیب
دشمنی اولسه حسددن یئری وار چونکه علی
جانشین و وصی حضرت طاها یازیلیب
طائرا شعریوه قیمت وراجاخ نام علی
هانسی دیل مدح ایلسه حیدری گویا یازیلیب
#طائر اورنگی
۱۴۰۰/۵/۵
- جمعه
- 29
- بهمن
- 1400
- ساعت
- 18:23
- نوشته شده توسط
- طائر
- شاعر:
-
طائر اورنگی
ارسال دیدگاه